تطرق الإعلامي اللبناني الساخر نديم قطيش، في حلقة اليوم من برنامج DNA، إلى الغارات الإسرائيلية على "أهداف عسكرية لجيش الأسد داخل سوريا".
وسخر قطيش قائلاً إن "الخبر تقريباً صار كتير كتير كتير عادي لدرجة غريبة بإعلام الأسد". واستعرض كيفية تناول القنوات الخبر مستهزئاً "إعلام العدو يقول. ما عنا وقت نتأكد إذا الخبر صح أو لا. كتّر خيرن ذكروا. يعني مش قليلة بهيك ظرف بظل انشغالات محور المقاومة بذبح الشعب السوري يلاقي وقت لخبر عدوان إسرائيلي". وهنا عرض الإعلامي اللبناني حديثا من محلل سياسي سوري يقول إن "هذا العدوان ليس مفاجئاً حقيقة"، يتبعه مشهد ساخر من فيلم لعادل إمام يقول فيه "متعوّدة".
وأضاف قطيش بتهكم "غير مفاجئ. تعوّدنا تعوّدنا. بعد ضربتين ثلاثة رح تتحوّل العادة لإدمان". ويتابع بسخرية "شو غير مفاجئ. المفاجئ أنو وين الدفاعات الجوية. برضو مش قليل مش قليل قناة سما تلاقي وقت للخبر. أنو صراحة هيدي مش دايماً عم بتسير بإعلام المقاومة".
كما سخر الإعلامي من قناة المنار لعدم تطرقها للخبر قائلاً إنها "لمبارح بالليل ما معا خبر. لنشرة الـ11.30 ما معا خبر بالعدوان الغاشم. قلك غارة بالزايد غارة بالناقص مش آخر الدنيا بلاها. بعدين المنار إعلام مباشر لحزب الله. يعني بيعكس أولويات حزب الله الاستراتيجية صح؟".
